Ülvi Həsənli
İyulun 20-dən həbsdə aclıq aksiyası keçirdiyi bildirilən “Abzas Media” nəşrinin direktoru Ülvi Həsənlinin səhhətinin bir qədər də pisləşdiyi deyilir. Bu barədə jurnalistin ailəsi məlumat yayıb.
Bildirilib ki, saxlanıldığı Umbakı həbsxanasında havalandırma sistemi pis olduğuna görə, o, normal nəfəs almaqda çətinlik çəkir.
Ailəsi habelə qeyd edib ki, müəssisədə lazımi ləvazimatlar olmadığından Ülvi Həsənli doğru-düzgün həkim nəzarətindən keçirilməyib.
Jurnalistin ailəsi əlavə edib ki, onun çəkisi artıq 65 kiloqrama (əvvəllər 74 kq olub) düşüb.
Ailəsi Ülvi Həsənlinin təcili olaraq müalicə müəssisəsinə köçülürməsini tələb edir.
Bundan əvvəl yaxınları onun təcridxanada huşunu da müvəqqəti itirdiyini açıqlamışdılar.
Hələlik, bütün bu deyilənlərə Penitensiar Xidmətdən münasibət almaq mümkün olmayıb.
Ülvi Həsənli iyulun 20-də müddətsiz aclığa başladığını açıqlayıb. O, bununla bağlı ictimaiyyətə ünvanladığı müraciətində bildirib ki, aksiyaya başlamasına səbəb, vəd edildiyi kimi, Bakı İstintaq Təcridxanasına köçürülməməsidir.
AzadlıqRadiosu
