Kənan Zeynalov
Müxalifətdə olan Azərbaycan Xalq Cəbhəsi Partiyasının (AXCP) sədri Əli Kərimlinin mühafizəçisi Kənan Zeynalovun oktyabrın 5-də inzibati qaydada həbs olunduğu bildirilir.
Partiyadan AzadlıqRadiosuna deyilib ki, Kənan Zeynalovu əvvəl mülki geyimli şəxslər Suraxanı rayon 33-cü polis bölməsinə aparıblar, sonra isə o, Suraxanı rayon Məhkəməsinə göndərilib:
“Kənan bəyi İnzibati Xətalar Məcəlləsinin 535.1-ci (Polis işçisinin və ya hərbi qulluqçunun qanuni tələbinə qəsdən tabe olmama) maddəsini pozmaqda təqsirli biliblər və ona 25 sutka həbs cəzası verilib”.
AXCP-dən hesab edirlər ki, Kənan Zeynalovun həbsi siyasi motivlidir və onun fəaliyyəti ilə bağlıdır. Amma rəsmilər ölkədə siyasi həbslərin olması ilə bağlı deyilənləri qəbul etmirlər.
Bu deyilənlərə, hələlik, Daxili İşlər Nazirliyi və Suraxanı rayon Məhkəməsindən münasibət almaq mümkün olmayıb.
Qeyd edək ki, AXCP sədrinin başqa bir mühafizəçi Niyaməddin Əhmədov isə terroru maliyyələşdirmə və başqa ittihamlarla 13 il həbs alıb. Partiya ona qarşı ittihamları da siyasi sayır.
AXCP-nin hazırda beşə qədər üzvü müxtəlif ittihamlarla həbsdə saxlanılır.
AzadlıqRadiosu