Tofiq Yaqublu
Müsavat Partiyasının və Milli Şuranın üzvü Tofiq Yaqubluya 9 il həbs cəzası verilib. Martın 10-da Bakı Ağır Cinayətlər Məhkəməsində ona hökm oxunub. Bu hökmlə Tofiq Yaqublu Cinayət Məcəlləsinin 178.3.2 (külli miqdarda ziyan vurmaqla dələduzluq) və 320-ci (saxta sənəd hazırlama və ya istifadə etmə) maddələri ilə təqsirli bilinib.
Hökmü Elnur Nuriyevin sədrlik etdiyi, Azər Tağıyev və Kamran Muxtarovdan ibarət hakimlər heyəti çıxarıb.
Tofiq Yaqublu ilə birlikdə mühakimə olunan Elnur Məmmədov isə 8 il azadlıqdan məhrum edilib.
Siyasi fəal məhkəməyə son sözündə indiyədək barəsində dörd dəfə cinayət işi qaldırıldığını, bundan əvvəlki üç məhkəmənin onu təqsirli bildiyini, barəsində cəza hökmü çıxardığını deyib.
Tofiq Yaqublu Almaniyaya getmək istəyən Elşən Hüseynov adlı şəxsdən Elnur Məmmədov vasitəsilə 25 min avro və 10 min manat alaraq onu aldatmaqda, ona saxta sənəd hazırlayıb verməkdə suçlanır.
Dövlət ittihamçısı Tofiq Yaqubluya 10 il, Elnur Məmmədova isə 9 il həbs cəzası verilməsini istəmişdi.
AzadlıqRadiosu
