Bəhruz Səmədov
Sentyabrın 3-də Bakı Apellyasiya Məhkəməsində Çexiyanın Karlova Universitetinin doktorantı Bəhruz Səmədovun dövlətə xəyanət ittihamı ilə 15 il həbs cəzasına verilmiş şikayətinə baxılıb.
Hakim Elmar Rəhimov Səmədovun 15 illik həbs hökmünü qüvvədə saxlayıb.
Bəhruz Səmədovun nənəsi Zibeydə Osmanova “Azadlıqradiosu”na bildirib ki, apellyasiya məhkəməsində vəkil 20-yə yaxın vəsatət qaldırsa da, heç biri təmin olunmayıb. Qapalı məhkəmə keçirilib və hökmün qüvvədə qaldığı elan edilib. Osmanova vurğulayıb ki, heç bir sübut olmadan gənc adam 15 il həbsxanada saxlanacaq.
Cinayət törətmədiyini bildirən Bəhruz Səmədov apellyasiya qərarına etiraz olaraq sentyabrın 4-dən etibarən aclığa başlayacağını açıqlayıb.
Xatırladaq ki, Bəhruz Səmədov 2024-cü il avqustun 21-də Dövlət Təhlükəsizlik Xidmətinin əməkdaşları tərəfindən saxlanılıb. O, Cinayət Məcəlləsinin 274-cü maddəsi (dövlətə xəyanət) ilə ittiham olunur və ittihamı qəbul etmir.
Meydan TV
