42
Elnarə Qasımova
Yanvarın 15-də jurnalist Elnarə Qasımova barəsində 2 ay 17 gün müddətində həbs qətimkan tədbiri seçilib. Abzas Media-nın məlumatına görə, Xətai Rayon Məhkəməsində Bakı Şəhər Baş Polis İdarəsinin müstəntiqinin jurnalistin həbsinə dair təqdimatına baxılıb və hakim təqdimatı təmin edib.
Qasımova bu iş üzrə həbs edilən 6-cı jurnalistdir.
Xatırlatma
Yanvarın 13-də “Abzas Media” işi üzrə yaranmış sualları cavablandırmaq adı ilə yenidən Bakı şəhər Baş Polis İdarəsinə çağırılan jurnalist saxlanılıb.
Ona qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb.
“Abzas Media” işi üzrə nəşrin daha öncə həbs edilən 5 əməkdaşına qarşı da eyni ittiham irəli sürülüb. Belə ki, noyabrın 20-də “Abzas Media”nın direktoru Ülvi Həsənli, onun müavini Məhəmməd Kekalov, noyabrın 21-də baş redaktor Sevinc Vaqifqızı, noyabrın 30-da reportyor Nərgiz Absalamova, dekabrın 13-də araşdırmaçı jurnalist Hafiz Babalı saxlanılıb. Barələrində həbs qətimkan tədbiri seçilib.
Jurnalistlər ittihamları qəbul etmir, həbslərinin jurnalist fəaliyyətləri, xüsusən də “Abzas Media”da dərc olunan korrupsiya araşdırmaları ilə bağlı olduğunu bildirirlər.