Jurnalist Fərid İsmayılov saxlanılıb

“Toplum TV işi” ilə bağlı cinayət işində barəsində polis nəzarətində qətimkan tədbiri seçilən jurnalist Fərid İsmayılov saxlanılıb.

Bu barədə Meydan TV-yə vəkili Zibeydə Sadıqova məlumat verib.

Fərid İsmayılzadə hazırda Xətai Rayon Məhkəməsindədir.

Fərid İsmayılzadənin evində axtarış aparılıb və ev yoldaşı Nihad Libettarianın da saxlanıldığı bildirilir.

Həmin şəxsin hazırda Bakı Şəhər Baş Polis İdarəsində olduğu deyilir.

“Toplum TV”nin başqa bir əməkdaşı Elmir Abbasov da Bakı Şəhər Baş Polis İdarəsinə çağırılıb.

Bu gün, yanvarın 17-də “Toplum TV işi” üzrə istintaq yekunlaşıb.

Bu iş üzrə ittiham ağırlaşdırılıb, təqsirləndirilən şəxslərə qarşı Cinayət Məcəlləsinin 162-1.1, 192.3.2, 193-1.3.1, 193-1.3.2, 206.4, 213.2.1 maddələri ilə yeni ittihamlar irəli sürülüb.

2023-cü il martın 6-da “Toplum” internet televiziyasının redaksiyasında və Demokratik Təşəbbüslər İnstitutunun ofisində polisin axtarışı olub və qapısı möhürlənib.

Bu cinayət işi üzrə ümumilikdə 9 nəfər cinayət məsuliyyətinə cəlb olunub.

Onlardan 7 nəfər haqqında həbs qətimkan tədbiri seçilib, ikisinin isə istintaq dövründə azadlıqda qalmasına qərar verilib.

Meydan TV