Elşən Kərimov
Aprelin 24-də Bakı Apellyasiya Məhkəməsi hakim Elbəy Allahverdiyevin sədrliyi ilə fəal Elşən Kərimov barəsində Bakı şəhər Binəqədi Rayon Məhkəməsinin qərarından verilən şikayəti təmin etməyib. Məhkəmə Kərimovu həbsdə saxlayıb.
Bu barədə vəkil Zibeydə Sadıqova Amerikanın Səsinə deyib.
Vəkilin sözlərinə görə, Elşən Kərimov məhkəmədə ittihamı qəbul etmədiyini bildirib.
“O dedi ki, ittiham tamamilə əsassızdır. Rusiya vətəndaşıdır, 57 yaşı var. İlk dəfədir ki, hansısa cinayət əməlində ittiham olunur. Azərbaycana atasının yas mərasimində iştirak etnmək üçün gəlib. Yas mərasimi zamanı saxlanılıb”, Sadıqova qeyd edib.
Elşən Kərimov barəsində seçilmiş həbs qətimkan tədbiri ilə də razı deyil.
“Çünki alternativ imkan tədbirləri də var”, vəkil bildirib.
Xatırlatma
Elşən Kərimova aprelin 17-də Yevlax rayonunun Rüstəmli kəndində saxlanılıb. Onun barəsində Baş Prokurorluğun İstintaq İdarəsində Cinayət Məcəlləsinin 281.1 (Hakimiyyətin zorla ələ keçirilməsinə yönələn açıq çağırışlar etmə, habelə bu cür məzmunlu materialları yayma) maddəsi ilə cinayət işi başlanılıb. Aprelin 19-da Binəqədi Rayon Məhkəməsi Kərimov barəsində 3 aylıq həbs qəti imkan tədbiri seçib.
Elşən Kərimov sosial şəbəkələrdə son zamanlar Azərbaycanda həbs edilən Azərbaycan Xalq Cəbhəsi Partiyasının fəallarını, digər siyasi partiya üzvlərini, ictimai fəalları və jurnalistləri müdafiə edən paylaşımlar edib.
Amerikanın Səsi
