Bu barədə məlumatı Azərbaycan Respublikasının Baş Prokurorluğu yayıb
Həmin şəxslərdən biri Azərbaycan Respublikasının Dövlət Sığorta Kommersiya şirkətinin Xaçmaz filialının direktoru Fərhad Dəmirovdur.
Baş Prokurorluq bildirir ki, Fərhad Dəmirov sığorta ödənişinin verilməsi üçün Xaçmaz rayon sakini Asif Məlikovdan 1200 manat pul istəyib.
Prokurorluq bildirir ki, bununla bağlı Korrupsiyaya qarşı Mübarizə Baş İdarəsində araşdırma aparılıb:
“Keçirilmiş əməliyyat zamanı məlum olub ki, Fərhad Dəmirov noyabrın 17-də filialın inzibati binasında vətəndaşdan sürücüsü Şəhriyar Qeybullayev vasitəsilə 1200 alıb. Onlar cinayət başında yaxalanıblar. Fərhad Dəmirovun xidməti otağına baxış zamanı oradan müxtəlif sənədlər və 8 ədəd bank kartı aşkar olunaraq götürülüb”.
Baş Prokurorluğun apardığı araşdırmaya görə, Ağdam rayonu Güllücə kəndi ətrafında gedən döyüş zamanı yaralanmış, 17 sentyabr 2003-cü il tarixdə ehtiyata buraxılmış və 25 oktyabr 2013-cü il tarixdə Müdafiə Nazirliyinin Mərkəzi hərbi həkim komissiyasının qərarına əsasən Azərbaycan Respublikasının müdafiəsi zamanı hərbi travma alması barədə rəy verilmiş Asif Məlikova 6 min 600 manat məbləğində icbari sığortanın ödənilməsi haqqında Nəsimi rayon məhkəməsinin müvafiq qərarının icra edilməsi müqabilində, Dövlət Sığorta Kommersiya şirkətinin Xaçmaz filialının direktoru Fərhad Dəmirovun 2020-ci ilin noyabr ayının əvvəllərində həmin şəxsdən 1.200 manat məbləğində pul vəsaitini rüşvət qismində istəməklə, 17 noyabr 2020-ci il tarixdə filialın inzibati binasında baş mütəxəssis vəzifəsində çalışan Şəhriyar Qeybullayev vasitəsilə həmin pul vəsaitini rüşvət qismində almasına əsaslı şübhələr müəyyən edilmişdir.
Toplanmış material üzrə 17 noyabr 2020-ci il tarixdə Cinayət Məcəlləsinin 311.1-ci (rüşvət alma) maddəsi ilə cinayət işi başlanıb.
Fərhad Dəmirov və Şəhriyar Qeybullayev şübhəli şəxs qismində tutularaq istintaqa cəlb olunub.
Baş Prokurorluq bildirir ki, hazırda iş üzrə əhəmiyyət kəsb edən halların müəyyən edilməsi məqsədilə zəruri istintaq hərəkətlərinin həyata keçirilməsi davam etdirilir.
“Öz fəaliyyətlərində yol verdikləri qanunsuzluqlarla dövlət orqanlarının nüfuzuna xələl gətirən, onların uğurlu fəaliyyətinə kölgə salan vəzifəli şəxslərin aşkar edilərək məsuliyyətə cəlb olunmaları istiqamətində müvafiq tədbirlər davam etdirilir”.
