[:az]
Azərbaycan Xalq Cəbhəsi Partiyasının (AXCP) üzvü Sarvan Cumayevin də inzibati qaydada həbs olunduğu bildirilir.
Bu barədə Azadlıq Radiosuna AXCP-dən məlumat verilib. Məlumata görə, Sarvan Cumayev iyulun 28-də məhkəmənin qərarı ilə İnzibati Xətalar Məcəlləsinin 211.1-ci maddəsi ilə (Epidemiya əleyhinə rejimin, sanitariya-gigiyena və karantin rejimlərinin pozulması) 30 sutka müddətinə həbs olunub (Koronavirus pandemiyası ilə bağlı martin 24-dən Azərbaycanda karantin rejimi elan edilib) .
AXCP onun iyulun 26-da saxlandığını açıqlamışdı.
Bu məlumatı, hələlik, rəsmi qurumlardan dəqiqləşdirmək mümkün olmayıb.
AXCP-dən verilən məlumata görə, son iki həftə ərzində partiyanın ümumilikdə 38 üzvü saxlanıb. Onlardan 16 nəfəri haqqında cinayət işi başlanıb, biri istisna olmaqla, digərləri barəsində həbs-qətimkan tədbiri seçilib. Daha 15-ə yaxın cəbhəçinin karantin rejimini pozmaqda suçlandığı, onların hər birinə inzibati həbs cəzası verildiyi bildirilir.
Saxlananlardan bəzisinin də buraxıldığı açıqlanıb.
Cinayət məsuliyyətinə cəlb olunanlara qarşı əsasən Cinayət Məcəlləsinin (CM) 186.2.1 (Özgənin əmlakını qəsdən məhv etmə və ya zədələmə), 233 (ictimai qaydanın pozulması) və 315 (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə ittiham irəli sürülüb. Həbs olunanlardan ikisinə əlavə 278-ci (hakimiyyəti zorla ələ keçirmə və ya onu zorla saxlamağa yönəlik hərəkətlər) maddəylə də ittiham verilib.
Azadlıq Radiosu[:]
