[:az]
Ölən şəxs məktəb direktorunun müavini olub
Dövlət Yol Polisi əməkdaşlarının Goranboy rayonunda saxladığı şəxs şöbənin həyətində ölüb.
Bu barədə “Report” xəbər verir.
DİN-in mətbuat xidmətinin Gəncə Regional qrupu məlumat verib ki, aprelin 4-də axşam saat 20:30 radələrində Goranboy rayon sakini, 1956-cı il təvəllüdlü Yolçiyev İlham Zakir oğlu idarə etdiyi “VAZ-2107” markalı avtomobillə hərəkətdə olan zaman (ailəsi ilə birgə), uzaq görən işıq vurma qaydalarını düzgün istifadə etmədiyi üçün yol polisi əməkdaşları tərəfindən saxlanılıb.
“Bu zaman sürücünün sərxoş olduğu da məlum olub və polis əməkdaşları tərəfindən Goranboy Rayon Polis Şöbəsinə aparılıb. Onun barəsində İnzibati Xətalar Məcəlləsinin 333.1-ci maddəsi ilə protokol tərtib edilib və sonra buraxılıb. İ.Yolçiyev şöbənin həyətinə çıxan zaman anidən halı pisləşib. Oraya dərhal təcili tibbi yardım briqadası çağırılıb və təcili tibbi yardım maşını ilə xəstəxanaya aparılan zaman yolda ürək tutmasından ölüb”.
Məlumata görə, vəfat edən İlham Yolçiyev Goranbay rayonu, Elxan Məmmədov adına Goranlı kənd orta məktəbinin direktor müavini olub.
“Ailəsi də (həyat yoldaşı, qızı və oğlu) orada olub və onlar polisdən şikayətçi olmadıqlarını, İ.Yolçiyevin ailəsində irsi olaraq ürək xəstəliyi olduğunu deyiblər”, – məlumatda bildirilib.
Meydan TV[:]
