Müşviq Cabbar
Sentyabrın 10-da Bakının Xətai Rayon Məhkəməsi hakim Rafael Sadıqovun sədrliyi ilə “Toplum TV”nin jurnalisti Müşviq Cabbarın iddiasını təmin etməyib. Belə ki, Cabbar yaxınlarına etibarnamə verməsinə icazə verilməməsindən şikayət edib.
Vəkil Nazim Musayev bildirib ki, etibarnaməyə zərurət onunla əlaqədardır ki, jurnalsit həbsindən əvvəl hərracda avtomobil alıb. Avtomobil Azərbaycana gətirilənə qədər jurnalist həbs edilib. May ayından avtomobil gömrük məntəqəsində saxlanılır və park haqqı hesablanır. Cabbar avtomobili gömrükdən keçirmək üçün yaxınlarına etibarnamə verməlidir. Lakin istintaq təcridxanasının rəhbərliyi müstəntiqin qadağasına istinad edərək bundan imtina edir.
Vəkilin sözlərinə görə, hakim xaricdən avtomobil gətirilməsinə dair sənədlərin olmamasına istinad edərək vəsatəti təmin etməyib.
“Ancaq söhbət ümumiyyətlə cinayət işinə heç bir aidiyyatı olmayan avtomobildən gedir. İstintaq təcridxanasında saxlanılan şəxsin öz yaxınlarına etibarnamə vermək üçün qanuni hüququ var”, vəkil deyib.
Martın 6-8-də “Toplum” TV və onun tərəfdaş təşkilatı Demokratik Təşəbbüslər İnstitutunun 9 əməkdaşı saxlanılıb. Onlar xarici valyuta qaçaqmalçılığında ittiham olunurlar. Yeddi nəfər həbs edilib, iki nəfər polis nəzarətinə verilib.
Hüquq müdafiəçiləri bu iş üzrə keçənləri siyasi məhbuslar kimi tanıyıblar, beynəlxalq təşkilatlar onları azad etməyə çağırıblar.
Turan
