Aytac Ağazadə
Bu gün, aprelin 11-də “QHT işi” üzrə daha bir nəfər barədə həbs qərarı çıxarılıb.
İctimai fəal Aytac Ağazadə ilə bağlı istintaq orqanından məhkəməyə təqdimat daxil olub. Təqdimata Binəqədi rayon Məhkəməsində baxılıb.
Məhkəmənin qərarına əsasən, onun barəsində 4 aylıq həbs-qətimkan tədbiri seçilib.
Amma o, ölkədə olmadığından haqqında axtarış elan edildiyi vurğulanır.
Xatırlatma
“QHT işi” üzrə ictimai fəal Asəf Əhmədov və sosial işçi Zamin Zəki ilə yanaşı, Əhməd Məmmədzadə barəsində də Binəqədi rayon Məhkəməsinin qərarı ilə həbs-qətimkan tədbiri seçilib. Onunla da bağlı qərarın, digər iki şəxs kimi, aprelin 9-da verildiyi bildirilir.
Bu iş üzrə daha bir neçə şəxs, o cümlədən İqtisadi Tədqiqatlar Mərkəzinin sədri Qalib Toğrulun isə polis nəzarətinə verildiyi deyilir.
Bu məlumata, hələlik, Baş Prokurorluğun İstintaq idarəsindən münasibət almaq mümkün olmayıb.
AzadlıqRadiosu
