Tofiq Yaqublu
Milli Şura və Müsavat Partiyasının həbsdə aclıq aksiyası keçirən üzvü Tofiq Yaqublunun artıq 10 kiloqramdan çox çəki itirdiyi deyilir.
Bu barədə onun qızı Nigar Həzi məlumat verib. Onun deməsinə görə, aprelin 14-də vəkil Nazim Musayev təcridxanada atası ilə görüşüb:
“Vəkil bildirdi ki, Tofiq Yaqublu çox taqətsiz, yorğun, halsız idi. 14 gündür aclıq edir, artıq çəkisi 85 kiloqram 400 qrama düşüb. Saturasiya və ürək döyüntüsü 96, təzyiq isə 111/75-dir. Artıq iki həftə ərzində 10 kiloqramdan çox çəki itirib”.
Nigar Həzinin sözlərinə görə, Penitensiar Xidmət hələ də Tofiq Yaqublunu həkim Adil Qeybullanın müayinə etməsi ilə bağlı müdafiə tərəfinin müraciətinə cavab verməyib.
Tofiq Yaqublunun qızının açıqlamasına rəsmi qurumlardan münasibət almaq mümkün olmayıb.
AzadlıqRadiosu
