Rüfət Səfərov

İctimai-siyasi fəalların təqiblərə məruz qaldığı işlərlə bağlı hüquq müdafiə fəaliyyəti göstərən Rüfət Səfərov özü artıq 7 aydır həbsdədir

İyunun 30-da “Müdafiə Xətti” hüquq müdafiə təşkilatının həmtəsisçisi Rüfət Səfərovun işi üzrə məhkəmə iclası başlayıb.

“Abzas Media”ya bu barədə onun yaxınları məlumat verib. Bildirilib ki, proses Bakı Ağır Cinayətlər məhkəməsində hakim Aygün Qurbanovanın sədrliyilə keçirilib.

“Rüfət Səfərovun anket məlumatları dəqiqləşdirildi. Vəkili həbs qətimkan tədbirinin ev dustaqlığı ilə əvəz olunması barədə vəsatət verdi, ancaq məhkəmə vəsatəti təmin etmədi. İş məhkəmə baxışına verildi”, – məlumatda qeyd olunub.

Məhkəmənin baxış iclası iyulun 14-nə təyin edilib.

Rüfət Səfərov ötən ilin dekabrında saxlanılıb. Ona qarşı Cinayət Məcəlləsinin 178.3.2-ci (dələduzluq – külli miqdarda ziyan vurmaqla törədildikdə), 127.2.3-cü (qəsdən sağlamlığa az ağır zərər vurma) və 221.1-ci (xuliqanlıq) maddələri ilə ittiham irəli sürülüb və barəsində həbs qətimkan tədbiri seçilib.

Rüfət Səfərov ittihamları rədd edir və hüquq müdafiə fəaliyyətinə görə həbs oliunduğunu deyir. Yerli huquq müdafəçiləri də onu siyasi məhbus hesab ediblər.

10 Dekabr – İnsan Hüquqları Günündə ABŞ Dövlət Departamenti Səfərovu mükafatlandırıb. O, ilin ən cəsarətli hüquq müdafiəçilərinə verilən mükafata ayiq görülüb.

Vaxtilə Zərdab Rayon Prokurorluğunda müstəntiq işləyən Səfərov 2015-ci ildə insan hüquqları və demokratiya sahəsindəki pozuntuları əsas göstərərək vəzifəsindən istefa verib.

O, 2016-ci ildə rüşvət almaqda ittiham olunaraq həbs olunub və 9 il azadlıqdan məhrum edilib. Yerli və beynəlxalq hüquq müdafiə təşkilatları onu siyasi məhbus kimi tanımışdı.

2020-ci ildə prezident İlham Əliyevin imzaladığı əfv sərəncamı ilə azadlığa çıxan Rüfət Səfərov hüquq müdafiəsi sahəsini fəaliyyətini daha da gücləndirib.

AbzasMedia

İyunun 30-da polisin “Sputnik Azərbaycan”ın Bakı ofisində əməliyyat keçirdiyi bildirilir.

Hökumətyönlü medianın Daxili İşlər Nazirliyinin mətbuat xidmətinə istinadla yaydığı məlumatda belə deyilir.

“Sputnik Azərbaycan” hələki məsələylə bağlı  münasibət bildirməyib.

Yenilənmiş məlumata görə, “Sputnik Azərbaycan” agentliyinin ofisində keçilən əməliyyat zamanı saxlanılanlar var.

Əməliyyat zamanı Rusiyanın Federal Təhlükəsizlik Xidmətinin ( FTX) bu agentlikdə çalışan iki əməkdaşı saxlanılıb.

“Sputnik Azərbaycan” Rusiyanın dövlətə məxsus “Rossiya Seqodnya” agentliyinin tərkibində fəaliyyət göstərir.

Azərbaycanda 2015-ci ilin mayından fəaliyyətə başlayan qurum ölkə və dünya xəbərlərini Azərbaycan və rus dillərində təqdim edib.

Bir müddət əvvəl “Rossiya Segodnya”nın (“Sputnik-Azərbaycan”) nümayəndəliyi ləğv edilib. Bildirilib ki, onlar yalnız bir müxbir vasitəsilə akkreditasiyadan keçə bilər.

Toplum TV

Ülvi Həsənli

“Abzas Media işi” üzrə 9 il azadlıqdan məhrum edilən media qurumunun direktoru Ülvi Həsənlidən 5 gündür xəbər alınmır. Bu barədə məlumatı jurnalistin ailəsi yayıb.

Bildirilir ki, Həsənli iyunun 26-da Bakının Umbakı qəsəbəsində yerləşən Penitensiar kompleksə köçürüldükdən sonra onunla əlaqə saxlamaq mümkün olmayıb.

Eyni iş üzrə həbs edilərək həmin müəssisəyə aparılan digər jurnalistlər artıq ailələri ilə əlaqə saxlayıb görüşsələr də, Ülvi Həsənli hələ də ailəsi ilə telefon danışığı belə edə bilməyib.

Ülvi Həsənlinin həyat yoldaşı Rübabə Quliyeva bildirib ki, məsələ ilə bağlı Penitensiar Xidmətin qaynar xəttinə müraciət edib, müraciətin qeydə alındığı bildirilib. Ombudsman Aparatına edilən zənglər isə cavabsız qalıb.

Məlumata görə, Ülvi Həsənli Bakı İstintaq Təcridxanasından Umbakıdakı Penitensiar kompleksə köçürülmələrinə etiraz edib və burada saxlanılacağı halda aclıq aksiyasına başlayacağını bildirib. Ailəsi Həsənlinin buna görə cərimə kamerasına (“kars”) salınmasından narahatdır.

İyunun 20-də Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilən prosesdə “Abzas Media işi” üzrə hökm oxunub. Ülvi Həsənli, Sevinc Vaqifqızı, Hafiz Babalı və Fərid Mehralızadə 9 il, Nərgiz Absalamova və Elnarə Qasımova 8 il, Məhəmməd Kekalov isə 7 il 6 ay azadlıqdan məhrum edilib.

2023-cü ilin noyabrında “Abzas Media”nın direktor və əməkdaşları korrupsiya araşdırmaları apardıqları bir vaxtda həbs olunmuşdu. Ötən il mayda “Azadlıq Radiosu”nun jurnalisti Fərid Mehralızadə də bu iş üzrə saxlanılmışdı, lakin “Abzas Media” onunla əməkdaşlıq etmədiyini bəyan etmişdi.

Həbs edilən jurnalistlər ittihamları rədd edir və həbsin korrupsiya araşdırmaları ilə bağlı siyasi sifariş olduğunu bildirirlər. Yerli və beynəlxalq hüquq müdafiə təşkilatları da bu həbsləri siyasi motivli hesab edir və jurnalistlərin dərhal azad edilməsinə çağırır.

AbzasMedia

Avropa Parlamentində Azərbaycanda jurnalistlərə, fəallara qarşı siyasi motivli məhkəmələr çərçivəsində çıxarılan qərarları pisləyən birgə bəyanat qəbul olunub. Parlamentin İnsan Hüquqları Alt komitəsinin sədri, deputat Munir Saturi, Cənubi Qafqazla əlaqələr üzrə nümayəndə heyətinin sədri, deputat Nils Uşakovs və Azərbaycan üzrə daimi məruzəçi, deputat Dan Barna Azərbaycanda siyasi motivli işlər üzrə jurnalistlərə, tədqiqatçılara və vətəndaş cəmiyyəti fəallarına qarşı sərt həbs cəzalarının verilməsi ilə bağlı narahatlıqlarını bildiriblər.

“Son günlər Azərbaycanda siyasi motivli işlərdə jurnalistlərə, tədqiqatçılara və fəallara verilən son dərəcə ağır həbs cəzaları bizi dəhşətə gətirir. Onların heç biri – eləcə də ölkədəki digər siyasi məhbuslar, – ümumiyyətlə, təqib olunmamalı idi. Lakin bu qeyri-adi dərəcədə ağır cəzalar hakimiyyət tənqidçilərinə qarşı Azərbaycanda davam edən repressiyanın daha da gücləndiyini göstərir”, – bəyanatda deyilir.

Avropalı parlamentarilər “AbzasMedia”nın həbsdə olan əməkdaşları Ülvi Həsənli, Sevinc Vaqifqızı, Hafiz Babalı, Nərgiz Absalamova, Elnarə Qasımova, fəal Məhəmməd Kekalov, AzadlıqRadiosunun jurnalisti Fərid Mehralızadə, talış tarixçi və etnoqraf İqbal Əbilov, müxalif fəal Tofiq Yaqublu, siyasi tədqiqatçı və sülh fəalı Bəhruz Səmədovun azadlıqdan məhrum edilməsi ilə bağlı çıxarılan məhkəmə hökmlərini xatırladıblar.

Birgə bəyanatda Aİ-nin Qlobal İnsan Hüquqları Sanksiya Rejimi çərçivəsində məsul Azərbaycan rəsmilərinə qarşı sanksiyaların tətbiqinə dair çağırış edilir:

“Biz (Aİ-nin Xarici siyasət və təhlükəsizlik məsələləri üzrə) ali nümayəndəni, (Avropa Komissiyasının) vitse-prezidenti və Avropa Xarici Fəaliyyət Xidmətini mövcud yolda rejimi cəsarətləndirəcək hər hansı addımdan qaçınmağa çağırırıq. Xatırladırıq ki, Parlament dəfələrlə Aİ ilə Azərbaycan arasında gələcək tərəfdaşlıq sazişi üçün bütün siyasi məhbusların azadlığa buraxılması və ölkədə insan haqları ilə bağlı durumun yaxşılaşdırılması şərtlərinin qoyulmasını tələb edib”.

AzadlıqRadiosu

“AbzasMedia” ilə bağlı cinayət işi üzrə həbsdə olan jurnalistlər, eləcə də politoloq Bəhruz Səmədovun hökmləri qüvvəyə minmədən Bakı İstintaq Təcridxanasından (Kürdəxanı) Umbakı qəsəbəsində yerləşən penitensiar kompleksə köçürülməsinə ailələri etiraz edir. Bu barədə AzadlıqRadiosuna onların yaxınları məlumat verib.

B.Səmədovun nənəsi Zibeydə Osmanova nəvəsinin Umbakıya köçürülməsindən iyunun 27-də xəbər tutub. Onun sözlərinə görə, bunu Bakı İstintaq Təcridxanasından öyrənib:

“Nə işçilər məlumat verib, nə də Bəhruza şərait yaradıblar ki, özü xəbər versin. Hökm hələ qüvvəyə minməyib, niyə köçürürlər?”.

“AbzasMedia”çıların yaxınları da onların Umbakıya köçürülməsindən narazıdır. Deyirlər ki, Penitensiar Xidmətin bu addımı qanunsuzdur, vəkil şikayət verəcək.

“Hökm qüvvəyə minməmiş onlar Kürdəxanıdan köçürülə bilməz. Hökmdə cümlə var ki, “hökm qüvvəyə minənədək barəsində seçilmiş həbs-qətimkan tədbiri dəyişdirilməsin”. Həbs-qətimkan tədbiri seçilməsi barədə qərarda da saxlanma yeri Bakı İstintaq Təcridxanası göstərilib. Deməli, qüvvəyə minənədək bu adamlar Bakı İstintaq Təcridxanasında saxlanmalıdırlar. Açıq-aşkar əvvəlki qərara da, indiki hökmə də ziddir, qanunsuz addımdır”, –jurnalistlərdən birinin ailə üzvü AzadlıqRadiosuna bildirib.

Həbsdəki jurnalist və ictimai fəalların haqqında hökm qüvvəyə minmədən onların yerdəyişməsi ilə əlaqədar yaxınların narazılığına Penitensiar Xidmətdən şərh almaq mümkün olmayıb.