Nyu-Yorkda yerləşən Beynəlxalq Jurnalistləri Müdafiə Komitəsi Azərbaycanda meclis.info saytının rəhbəri İmran Əliyevin həbsini pisləyib.
Komitə Azərbaycan hakimiyyətini Əliyevi və həbsdə olan digər jurnalistləri azad etməyə və beynəlxalq donorlardan qanunsuz maliyyələşmə ittihamı ilə həbsləri dayandırmağa çağırıb.
Əliyev Qərblə münasibətlərin pisləşməsi fonunda 2023-cü ilin noyabrından beynəlxalq donorlardan maliyyə alınması ilə bağlı valyuta qaçaqmalçılığı ittihamı üzrə cinayət məsuliyyətinə cəlb olunan on üçüncü jurnalistdir.
İmran Əliyevin yaxınları bildiriblər ki, polis jurnalisti döyüb və ona elektrik cərəyanı verərək işgəncə edib. Onun gözlərinin altında qançırlar və bədənində xəsarət izləri olub və onu etirafı imzalamağa məcbur ediblər, Komitənin bəyanatında deyilir.
“Beynəlxalq donorlardan qanunsuz pul almaq ittihamı ilə jurnalistlər arasında kütləvi həbslərin aparılması Azərbaycan hakimiyyətinin sinizmidir. Hökumət müstəqil, tənqidçi KİV-in həm ölkə daxilində, həm də xaricdə maliyyə almasını demək olar ki, mümkünsüz etmək üçün iyirmi il sərf edib”, -Komitənin Avropa və Orta Asiya üzrə proqramlarının koordinatoru Gülnoza Səid bildirib.
“Beynəlxalq tərəfdaşlar noyabrda keçiriləcək Cop29 iqlim konfransına qədər Azərbaycandan mətbuat azadlığının vəziyyətinin yaxşılaşdırılmasını qətiyyətlə tələb etməlidirlər”.
Hazırda daha on jurnalist oxşar ittihamlarla həbsdədir: “Abzas Media” araşdırma şirkətindən altı nəfər, iki nəfər “Kanal 13” onlayn kanalından və iki nəfər “Toplum” TV-dən. Bundan əlavə, ittiham olunan “Toplum” TV-nin iki əməkdaşı polisin nəzarətinə götürülərək məhkəmədən əvvəl sərbəst buraxılıb, Komitə xatırladıb.
Komitənin Əliyevin həbsinə münasibət bildirilməsilə bağlı Azərbaycan Daxili İşlər Nazirliyinə müraciəti cavabsız qalıb.
İmran Əliyev hökumətyönlü Qafqaz.info saytında Əliyevin “Abzas Media” və “Toplum” TV əməkdaşları ilə birlikdə pul qaçaqmalçılığına bağlılığı barədə yazı edildikdən sonra aprelin 18-də saxlanılıb.
Aprelin 19-da məhkəmə İmran Əliyevi iki ay müddətinə həbs edib.
Turan
