Qubad İbadoğlu ev dustaqlığına buraxılıb

Bu barədə Nərimanov Rayon Məhkəməsi qərar qəbul edib.

Məlumatı onun vəkili Bəhruz Bayramov verib.

Bundan əvvəl Qubad İbadoğlunun qızı Jalə Bayramova həbsdə saxlanılan atasının səhhətinin daha da ağırlaşdığını bildirib.

Bayramova deyib ki, atası bir sutkada 30 vahid insulin və əlavə bir neçə həb qəbul edir.

“Ayaq dırnaqlarında qaralmalar var və sol ayağının bir barmağında dırnaq bütövlüklə ətdən ayrılmaq təhlükəsindədi. Həbsxana şəraitində o, yaraya qulluq edə bilməz və əgər yara iltihablanarsa, onun barmağını və ayağını amputasiya edə bilərlər. Atamın əllərində, xüsusilə ayaqlarında periferik sinirlərin zədələnməsi baş verib və hamısı yüksək şəkərin fəsadlarıdır”, – Qubad İbadoğlunun qızı Facebook hesabında yaydığı müraciətdə qeyd edib.

Jalə Bayramova əlavə edib ki, Qubad İbadoğlunun vəziyyətilə bağlı məlumat verilsə də, nə onun saxlanıldığı 1 saylı Bakı İstintaq Təcridxanasının tibb bölməsi, nə də Ədliyyə Nazirliyinin Baş Tibb İdarəsi heç bir tədbir görmür.

Xatlrladaq ki, Qubad İbadoğlu 2023-cü il iyulun 23-də saxlanılıb. Ona qarşı Cinayət Məcəlləsinin 204.3.1 (saxta pul və ya xarici valyuta əldə etmə və ya satma – eyni əməllər mütəşəkkil dəstə tərəfindən törədildikdə), 167-3.1 (dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham irəli sürülüb.

Ötən il iyulun 24-də Nərimanov Rayon Məhkəməsinin qərarı ilə professor barəsində 3 ay 26 gün həbs qətimkan tədbiri seçilmiş, noyabrın 16-da isə həbs müddəti daha 3 ay uzadılmışdı. Bu il fevralın 24-də bu müddət daha 3 ay uzadılıb.