Arzu Sayadoğlu
Bloger hədə-qorxu ilə tələb etmə ittihamı ilə həbs olunub
Arzu Sayadoğlu yanvarın 16-da saxlanılıb, ayın 18-də isə 4 ay müddətinə həbs edilib. Bu barədə bazar ertəsi Turan agentliyinə Bakının Səbail Rayon Məhkəməsindən bildiriblər.
Sayadoğluna qarşı Azərbaycan CM-in 182.2.4-cü (hədə-qorxu ilə tələb etmə, xeyli miqdarda əmlak əldə etmək məqsədi ilə törədildikdə) maddəsi ilə ittiham irəli sürülüb. Bu maddə ilə onu beş ildən on ilədək həbs cəzası gözləyir. İstintaqı Dövlət Təhlükəsizliyi Xidməti aparır.
Hədə-qorxu ilə tələb etmənin məhz nədən ibarət olduğu və nə zaman baş verdiyi açıqlanmır.
* * *
İctimai fəal, bloger Arzu Sayadoğlunun barəsində Səbail Rayon Məhkəməsi təqsirləndirlən şəxs qismində həbs qətimkan tədbiri seçib. Bu barədə məhkəmənin elektron portalında məlumat var.
Bununla yanaşı məhkəmənin elektron portalında blogerin hansı cinayətdə ittiham olunduğu və barəsində hansı müddətə həbs qətimkan tədbiri seçilməsi barədə məlumat yoxdur.
Azərbaycan Daxili İşlər Nazirliyinin Mətbuat xidmətinin əməkdaşı İbrahim Əmiraslanlı Amerikanın Səsinə bildirib ki, Arzu Sayadoğlu polis əməkdaşları tərəfindən saxlanılmayıb.
Hüquq müdafiəçisi Rüfət Səfərov isə facebook səhifəsində blogerin Dövlət Təhlükəsizliyi Xidməti tərəfindən saxlanıldığını bildirib.
Dövlət Təhlükəsizliyi Xidmətindən şərh almaq mümkün olmayıb.
Hüquq müdafiəçisi Rüfət Səfərov hesab edir ki, Arzu Sayadoğlunun saxlanılması onun sonuncu dəfə “Azad söz” YouTube televiziya kanalında sərt tənqidi çıxışı ilə bağlıdır.
“Bloger hakimiyəti sərt qaydada tənqid edirdi və yoxa çıxamazdan öncə sonuncu dəfə “Azad Söz” YouTube televiziya kanalında mühacirətdə olan fəal Tural Sadıqlı ilə canlı yayımda olub”, o qeyd edib.
Arzu Sayadoğlu “Xalqa Xidmət Hərəkatı” yaratdığını da elan edib.
Turan
