Müsavat Partiyasının başqanı Arif Hacılı və oğlu Orxan Hacılı
Bakı Apellyasiya Məhkəməsində Müsavat Partiyasının başqanı Arif Hacılının oğlu Orxan Hacılının apellyasiya şikayətinə baxılıb.
Bu barədə Amerikanın Səsinə vəkil Nemət Kərimli bildirib. Onun sözlərinə görə noyabrın 7-də apellyasiya məhkəməsi ikinci instansiya məhkəməsinin qərarını qüvvədə saxlayıb.
“Hamıya məlum idi ki, bu, siyasi prosesdir. Onun həbsi yalnız müsavatçı olduğuna görə, Müsavat Partiyasının başqanı Arif Hacılının oğlu olduğuna görədir”, o bildirib.
Vəkil qeyd edir ki, Orxan Hacılının ittiham olunduğu maddələr cinayət qanunvericiliyinə görə, ictimai təhlükə törətməyən cinayət təsnifatına aiddir.
Bununla belə, vəkil Nemət Kərimli hadisələrin gedişatından aslı olaraq, növbəti addım olaraq Orxan Hacılının həbs qətimkan tədbirinin ev dustaqlığı ilə əvəz edilməsi barədə məhkəməyə müraciət edəcəyini deyib.
Öz növbəsində Arif Hacılı bildirib ki, şikayətin təmin olunmaması gözlənilən idi.
“Ümumiyyətlə bu hadisəni Azərbaycan cəmiyyətinə hörmətsizlik kimi dəyərləndirirəm. Çünki belə bir hadisəyə görə istintaq müddətində həbs-qətimkan tədbirinin seçilməsi, hətta Azərbaycanın hüquq mühafizə sistemi üçün yeni bir hadisədir”, Arif Hacılı qeyd edib.
Müsavat Partiyasının başqanı Arif Hacılının oğlu Orxan Hacılı barəsində iki aylıq həbs-qətimkan tədbiri seçilib.
Vəkil deyib ki, həbsdən öncə hadisə ilə bağlı sosial şəbəkələrdə video-görüntülər yayılıb.
“Orxan avtomobillə hərəkət edərkən qarşısına çıxan avtomobil sol tərəfə manevr edərək qaydanı pozur. Orxan avtomobili yayındırarkən həmin avtomobilə toxunur. Daha sonra Orxan avtomobilindən düşür həmin şəxslərlə görüşür. Həmin şəxslər hər hansı xəsarətin olmadığını bildirir. Hadisədən təxminən 20 gün keçəndən sonra deyirlər ki, guya orada səkidə kimsə oturubmuş, ona avtomobil dəyib və kəllə-beyin travması alıb”, Kərimli qeyd edib.
Xatırlatma
Orxan Hacılıya qarşı noyabrın 1-də Cinayət Məcəlləsinin 263.1 (Yol hərəkəti və nəqliyyat vasitələrinin istismarı qaydalarını pozma – ehtiyatsızlıqdan zərərçəkmiş şəxsin sağlamlığına az ağır zərər vurulmasına səbəb olduqda) və 264-cü (Yol nəqliyyat hadisəsi yerindən qaçma) maddələri ilə cinayət işi açılıb.
Öz növbəsində bununla bağlı hələlik Yasamal rayon məhkəməsindən və digər rəsmi qurumlardan rəsmi açıqlama almaq mümkün olmayıb.
