Digər gəncin isə cərimə edildiyi bildirilir
Bəstəkar Üzeyir Hacıbəylinin Bakı Musiqi Akademiyasının önündəki heykəlinə ayaqqabı atan şəxsin kimliyi məlum olub.
Daxili İşlər Nazirliyinin (DIN) mətbuat xidmətindən Meydan TV-yə bildirib ki, araşdırma zamanı əməli törətmiş 21 yaşlı İsmayılov Elvin Elgün oğlu və 17 yaşlı Cəfərov Fərid Fəxrəddin oğlu müəyyən olunaraq saxlanılıblar.
Elvin İsmayılov bu il yanvarın 1-də saat 15:40 radələrində sərxoş vəziyyətdə Bakı Musiqi Akademiyasının qarşısından keçərkən tanışı Fərid Cəfərovla zarafat etmək məqsədi ilə ona məxsus torbada olan ayaqqabını heykəl istiqamətində atdığını etiraf edib.
Faktla bağlı hər iki şəxs barəsində İnzibati Xətalar Məcəlləsinin müvafiq maddələri ilə inzibati xəta haqqında protokol tərtib edilib.
Bildirilir ki, Fərid Cəfərov cərimə olunub, Elvin İsmayılov isə Nəsimi Rayon Məhkəməsinin qərarı ilə 15 gün müddətinə inzibati qaydada həbs edilib.
Bu günlərdə sosial şəbəkələrdə Üzeyir Hacıbəyli adına Bakı Musiqi Akademiyası qarşısında zarafatlaşan iki gəncin videosu yayılıb.
Videodan məlum olub ki, aralarındakı zarafat zamanı biri digərinin ayaqqabısını heykəlin üzərinə atıb.
Bakı Musiqi Akademiyasından Meydan TV-yə bildirilib ki, həmin gənclər akademiyanın tələbələri deyil, yoldan keçənlərdir:
“Başa düşürəm, onlar cavandırlar. Amma onlara evdə, ailələrində demək lazım idi ki, belə olmaz. Hər halda səhv ediblər, cavanalıqlarına keçmək lazımdır. Təbii ki, bu hərəkətə mənim də etirazım var. Hər dəfə Üzeyir bəyin heykəlinin yanından ötəndə, qarşısında başımı əyib keçirəm”.
“Ümumiyyətlə, hər bir heykələ, yalnız Üzeyir Hacıbəyliyə deyil, Mirzə Ələkbər Sabirə, Nizamiyə, Füzuliyə, dahi insanlara ehtiramla yanaşmaq lazımdır. Uşaqlar ola bilsin, bilməyiblər”, – Xalq artisti, bəstəkar Faiq Sücəddinov məsələni Meydan TV-yə şərh edərkən deyib.
Meydan TV
